माझी महिनाअखेर

महिना अखेर काय असते आज मला कळू लागलेय,
शाळेत अर्ध्यादिवसाच्या सुट्टीसाठी महिनाअखेरीची
चातकाप्रमाणे वाट पहाणारा मी आज-
देणे कर्यांची वाट चुकवू लागलोय .

भाडे,बिलं आणि देणी यात आर्थिक महिनाअखेर
पहिल्याच आठवड्यात सुरू होऊ लागलीये.
अन या महिन्यातील खरेदीचा संकल्प,
न चुकता पुढच्या महिन्यात ढकलू लागलोय.

घरात भांड्यांची आदळआपट सुरू झालीये.
अन ऑफ़िसात डेटाबेस फ़ाटू लागलायं.
 प्रत्येक येणार्या कॉलला "I am busy,I will call you later"
असा रिप्लाय जाऊ लागलायं.

सारं काही सावरता सावरता-
आता स्वतःच घसरू लागलोय.
पोटापाण्याची आग विझवण्यासाठी,
स्वतः मात्र जळू लागलोय.

नको ती महिनाअखेर, अन नको ती चाकरी,
आता असे वाटू लागलेय.
अन जळू साहेबाच्या तोंडावर राजीनामा फ़ेकून
आता "जय महाराष्ट्र" म्हणावेसे वाटू लागलेय!!
                                         (संतोबा)संतोष गांजुरे.