हमीभाव

       दुष्काळ, शेतीमालाचे पडलेले भाव, नापिकी यामुळे शेतकऱ्यांची अवस्था बिकट आहे. आत्महत्येच्या घटना वाढू लागल्या आहेत आता शेतकऱ्यांसोबत आता कुटुंबातील व्यक्तींवरसुद्धा आत्महत्या करण्याची वेळ आली आहे. विरोधकांनी एसी गाड्यातून प्रवास केला म्हणून शेतकऱ्यांच्या दुष्काळाची दाहकता कमी झाली का? उलट विरोधकांच्या कर्ज माफीची मागणीला बरोबर महिन्याभरापूर्वी माननीय मुख्यमंत्री साहेबांनी "कर्जमाफी केली तर आत्महत्या होणार नाहीत याची हमी देणार का?" असा उलट असंवेदनशील  प्रश्न विरोधकांना केला होता. एखादा दुर्धर आजाराला शस्रक्रिया करण्याशिवाय पर्याय नसेल तर आपण इतर उपचार करत नाहीत का? शस्रक्रिया केल्यावर देखील आजार बरा होईल याची  हमी काय?  मुख्यमंत्री महोदय हमी कशाचीच देता येत नाही पण म्हणून काय प्रयत्नच करायचा नाही का?

आयपीएल सुरू झाली की बरेच खेळाडू दुखापतीमधून बरे होतात तर काहींचा गेलेला फॉर्म परत येतो, पण म्हणून त्यांना राष्ट्रीय संघात स्थान मिळेलच याची हमी देता येत नाही.

#हमी #हमीभाव

विरोधात असताना शेतकऱ्यांच्या होणाऱ्या आत्महत्याबद्दल सरकारवर हत्येचा गुन्हा दाखल करा म्हणणारे सत्तेत आल्यावर शेतकऱ्यांबद्दल तेवढेच संवेदनशील असतील याची हमी देता येत नाही!

#हमी #हमीभाव

महापुरुषांच्या जयंत्या उत्सवाप्रमाणे डिजेवर शांताबाई लावून साजऱ्या करणाऱ्या आणि फेसबुक, व्हाट्स अँपवर शुभेच्छा व गुणगान गाणाऱ्यांकडून त्या महापुरुषांचे विचार त्यांच्या दैनंदिन जीवनात आचरणात येतीलच याची हमी देता येत नाही.

#हमी #हमीभाव

जात-पात आणि कुंडल्या पाहून , अगदी छत्तीस गुण जुळवून लग्न केले तरी संसार टिकेल किंवा संसार सुखाचा होईलच याची हमी देता येत नाही.

#हमी #हमीभाव

कांदा २५-३० रुपये प्रतीकिलो झाल्यावर ज्यांच्या डोळ्यांत पाणी येते, त्यांच्या डोळ्यांत तोच कांदा २५-३० रुपये प्रती १० किलो झाल्यावर येईलच याची हमी देता येत नाही.

#हमी #हमीभाव

 तूरडाळीचे भाव २०० रुपये किलो झाल्यावर प्रसार माध्यमात आणि पांढरपेशी समाजात जेवढी चर्चा होते तेवढी चर्चा भाव ६०-७०₹ किलो झाल्यावर होईलच याची हमी देता येत नाही.

#हमी #हमीभाव

भ्रष्टाचाराचे , घोटाळ्यांचे अनेक आरोप करून आणि सोबत गाडीभर पुरावे असल्याचा दावा करणाऱ्यांची एकहाती सत्ता आली तरी आरोपींना शिक्षा होईलच याची हमी देता येत नाही.

#हमी #हमीभाव

शेतकऱ्याला सर्वसुखी समजणारे व त्यांना टॅक्स भरावा लागत नाही, तसेच कर्जमाफीच्या नुसत्या चर्चांमुळे जळफळाट होणारे, शेतकऱ्याच्या मुलाला लग्नासाठी मुलगी देईल याची हमी देता येत नाही.

#हमी #हमीभाव

निवडणुकांच्या तोंडावर एखादे खळबळजनक वक्तव्य, जोशपूर्ण भाषणे आणि एखादं- दुसरे आंदोलन केले म्हणून लोक एकहाती सत्ता देतीलच याची हमी देता येत नाही.

#हमी #हमीभाव

#हमीभाव हॅशटॅग चालवून सरकारला हमीभाव देण्याची सुबुद्धी सुचली तर चांगलंच आहे मी सुरुवात केलीय आपल्या सर्वांच्या सहकार्यानेच प्रयत्न करूया👍

संतोबा ( संतोष गांजुरे )