वर्तमानात मार्गक्रमण करत असताना, आपण भूतकाळात डोकावत असू तर भविष्यात आपण निश्चित अडखळणारच. जे होते, जे झालंय, त्यापेक्षा जे चाललं आहे आणि जे होणार आहे ते महत्वाचे.
स्वकर्तुत्वाने यशस्वी होताना, बदनामीची भीती बाळगून चालत नाही. जे आपल्याशी बरोबरी करू शकत नाहीत, ते निश्चितपणे आपली बदनामी करतात.
कधी कधी पात्रता नसणे ही एखाद्या पदाची पात्रता असू शकते. यामध्ये पात्र व्यक्तींवर अन्याय वगैरे नसून उच्चपदस्थाने आपल्या पदाला धोका होऊ नये म्हणून घेतलेली ती काळजी असते.
अनायासे मिळालेल्या गोष्टींच्याप्रतीची (आई-वडील,देश,धर्म,वंश,भाषा,प्रांत इ.) जबाबदारी, आपण त्या गोष्टींचे उदात्तीकरण करून साळसूदपणे झटकत असतो.
कितीही चांगली असो वा वाईट असो, कोणत्याही एकाच गोष्टीशी (विचारसरणी, व्यक्ती, आदर्श,पक्ष इ.) आपल्या निष्ठा बांधील नसाव्यात. अन्यथा ही एकनिष्ठता कट्टरवादाकडे झुकते आणि कोणताही कट्टरता वाद हा वाईटच असतो.
संतोबा...
#################
उन्माद करून वास्तव बदलत नाही,
फारतर उन्मादाची क्षणिक झिंग चढून
आपल्याला आपल्या स्वतःच्या योग्यतेचा विसर पडेल.
पण आपण केलेल्या उन्मादाची फळे आपल्यासह
आपल्या संबंधितांना वर्षानुवर्षे भोगावी लागतील.
संतोबा...
टिप - योग्यता हा सौम्य शब्द वापरला आहे. त्याऐवजी लायकी,औकाद,कुवत यांपैकी कोणताही वापरू शकता.
0 प्रतिक्रिया:
Post a Comment